Павышэнне коштаў на адукацыю

Павышэнне коштаў патлумачылі ў прэс-службе ВНУ парталу tut.by: "Гэта абумоўлена ростам выдаткаў на навучанне. У прыватнасці, павышэннем заработнай платы прафесарска-выкладчыцкага складу".

"Сітуцыя, калі кошты павышаюцца штогод, а то і кожны семестр, на жаль, стала ўжо звычнай, – распавядае СД Аляксандра Кузьміч, мэнэджарка праектаў Асацыяцыі дадатковай адукацыі і асветы. – Я рабіла даследванне росту коштаў, і за тры навучальныя гады кошты выраслі на 29-42% у беларускіх рублях і на 16-28% у доларавым эквіваленце. Гэта перавышае ўзровень інфляцыі, рост афіцыйнага сярэдняга заробку і ў большасці выпадкаў рост ВУП на душу насельніцтва - любы магчымы паказчык, па якім хоць неяк можна было б адсочваць аб'ектыўнасць росту коштаў.

– Немагчыма таксама сказаць, наколькі гэта апраўдана: сістэма адукацыі абсалютна непразрыстая ў пытаннях бюджэту. І каментуюць яе адпаведным чынам: растуць кошты на камунальныя плацяжы, трэба плаціць заробкі выкладачам. Але гэта ўсё вада, і аб'ектыўнасць росту коштаў немагчыма ані пацвердзіць, ані абвергнуць".

Мы звярнуліся ва Упраўленне адукацыйнай дзейнасці БДУ, каб даведацца, што рабіць студент_у, калі аплаціць новую суму ў гэтым годзе не атрымаецца. З намі згадзіліся пагутарыць, але прозвішча называць адмовіліся.

– Па словах суразмоўцы, з такім пытаннем трэба звяртацца да дэкана свайго факультэта.
– Універсітэт не збіраецца ўводзіць чацвёрты этап аплаты ці якія-небудзь дадатковыя ільготы.
– Студэнт_цы могуць прапанаваць сысці ў акадэмічны адпачынак, перавесціся на завочку, адлічыцца.
– Таксама ёсць варыянт аформіць індывідуальную адтэрміноўку плацяжу ў сувязі з "цяжкім матэрыяльным становішчам".

Студэнцкая супольнасць незадаволеная чарговымі зменамі ва ўніверах.

"Задзіночанне беларускіх студэнтаў выступае супраць павышэння коштаў на адукацыю па некалькіх прычынах, – паведаміла нам Ксенія Сырамалот, прэс-сакратарка ЗБС. – Першая прычына тычыцца размеркавання сродкаў. Бюджэт універсітэта застаецца непразрыстым, а студэнцтва і яго прадстаўніцтва не могуць аніяк паўплываць на размеркаванне сродкаў. То бок кошты за навучанне істотна павышаюцца, аднак змяненне якасці адукацыі застаецца невідавочным.

– Таксама кошты на навучанне павышаюцца ўжо падчас новага семестра, а студэнцтва, якое ўжо аплаціла вясенні семестр, абавязанае даплаціць розніцу. Мы лічым, што такая дамова паміж універсітэтам, студэнтамі і студэнткамі, калі кошты можна змяняць ледзь не кожны семестр, з'яўляецца няшчырай.

– Да таго ж студэнцтва і так з'яўляецца адной з уразлівых груп. У іх мала досведу і нізкая кваліфікацыя, няма істотнага даходу. Тыя, хто вучацца на дзённым аддзяленні часта, не могуць без шкоды сумяшчаць вучобу і працу".