Лукашэнка пра Стоўбцы: «У школах поўны бардак!» Алексіевіч: «няпраўда»

Аляксандр Лукашэнка звярнуў увагу найперш на парадак і дысцыпліну ў сферы сярэдняй адукацыі на прыкладзе трагічнага здарэння ў Стаўбцах: «Я сутки анализирую ситуацию и всякого рода разговоры на эту тему: кто виноват. Все мы виноваты, и дело не только и не столько в интернете. У нас в школах бардак, полный бардак. Никогда такого не было, ни в советские времена, ни в переломный период», — заявіў Аляксандр Лукашэнка. Пра здарэнне ў стаўбцоўскай школе стала вядома раніцай 11 лютага, калі 15-гадовы падлетак нажом зарэзаў настаўніцу і атакаваў трох старшакласнікаў. Адзін з вучняў памёр на месцы, два іншыя атрымалі траўмы і былі дастаўлены ў шпіталь. Зараз іх жыццю нічога не пагражае. Вядома, што падлетак не быў у стане алкагольнага ці наркатычнага ап'янення. Ці мае ён псіхічныя адхіленні, стане вядома пасля судовай псіхолага-псіхіятрычнай экспертызы.

«Надо на всю катушку спросить прежде всего с председателя райисполкома и с министра образования. Почему не навели порядок в школе? Школа — святое место. Как в церковь, надо идти в школу», — гаворыць Лукашэнка. Паводле яго слоў, галоўная каштоўнасць — гэта чалавечае жыццё.

Пісьменніца Святлана Алексіевіч у інтэрв'ю «Свабодзе» пракаментавала выказванні вышэйшых дзяржаўных асоб пра вытокі стаўбцоўскай трагедыі: «У паветры вісіць нейкая нянавісць, людзі ёй проста зараджаюцца, падсілкоўваюцца. З’яўляецца перакананне, што праблемы можна вырашыць гвалтам — нажом, аўтаматам. А гэта самая страшная думка, якая можа з’явіцца. Дух гвалту, на жаль, сёння прысутнічае ў нашым жыцці ва ўсім і ўсюды.

Я бачыла твары выкладчыкаў, дырэктара той школы. І няпраўда, што там бардак, не было яго там ніколі. Гэта відавочна нават па твары той цудоўнай загінулай настаўніцы, якую вельмі любілі вучні — яны адзін за адным пра гэта гаварылі яшчэ да таго, як яе не стала».

А таксама вельмі трапна звярнула ўвагу на словы і дзеянні самаго прэзідэнта: «На ўсіх узроўнях паступова ўкараняецца думка, што ўсё можна вырашыць крыкам, сілай. Паглядзіце, як паводзіць сябе той жа Лукашэнка — загадвае міністру: давай, гавары, іначай выйдзеш адсюль у ланцугах-кайданках. Гэта ж таксама гвалт, непавага да чалавечай годнасці.А калі ён не так даўно заявіў, што біць дзяцей — гэта „нацыянальная традыцыя“, дык пра што наогул казаць? Мне вось цікава: ён і свайго малодшага Кольку б’е, як некалі старэйшых? І за што, за якія правіны? Шчыра кажучы, я пабывала і ў багатых краінах, і ў бяднейшых, але нічога падобнага не чула з вуснаў вышэйшага кіраўніка».

Пра прычыны забойства сказала наступнае: «Калі я бываю за мяжой, выступаю ў гімназіях, ліцэях, там зусім іншая танальнасць размовы — вучняў паміж сабой, з настаўнікам, з вышэйшым начальствам, якое апякуецца гэтай школай.І нават нягледзячы на гэта, там таксама здараюцца забойствы. Бо зноў жа існуе дух саперніцтва, непрымання чужых поспехаў».