— Тры тыдні таму студэнты Уроцлава і прыхільнікі ініцыятывы «Студэнцкая прысутнасць» абвесцілі старт кампаніі #заклік і выслалі дакумент-патрабаванне да шырокага кола палітычных актараў дэмакратычных сіл Беларусі. З таго самага дня мы яны вырашылі штовечар збірацца ў цэнтры Уроцлава, каб прыцягнуць увагу беларускай супольнасці і дамагчыся, каб па кожным з трох пунктаў дакументу былі дадзеныя публічныя адказы.

— Мы патрабуем, каб быў створаны дакумент з як мага шырэйшым колам дэмакратычных сілаў, якія ў сваёй дзейнасці кіруюцца інтарэсамі беларусаў як нацыі і ў якім, сярод іншага, будзе прапісана аб механізмах супрацы, прыняцце нейкіх агульных рашэнняў, механізмах абмеркавання пытанняў і г.д. Толькі дзякуючы такому дакументу мы атрымаем хоць нейкую яснасць, што цяпер усе лідары сапраўды аб'ядналіся ў барацьбе з таталітарным рэжымам. Мы моцна верым у перамогу Украіны ў вайне з Расіяй і таму хочам, каб да таго моманту ўсімі дэмакратычнымі сіламі быў падрыхтаваны сумесны план дзеянняў, каб не было нейкай разрозненасці ў тым, што нам кажуць рабіць. Таму ўсё гэта павінна спачатку добра абмяркоўвацца ўнутры, з выслухваннем крытыкі і парадаў, а потым, у адпаведнасці з тымі механізмамі, што будуць прапісаныя, павінна прымацца нейкае рашэнне, якое будзе паважацца і выконвацца.

Цяперашні пераходны кабінет нічога істотна не змяніў. Кабінет быў створаны і так з лаяльных адно да аднаго асобаў. А ў процівагу гэтаму мы назіраем, што іншыя палітычныя актары пачалі выступаць да такога роду аб'яднання з яшчэ большай крытыкай.

— Раней мы існавалі пад іншай назвай як невялікая ініцыятыва, якая таксама ставіла мэту яднаць беларускае студэнцтва ва Уроцлаве. Існаваў звычайны чат у тэлеграме, дзе публікаваліся абвесткі з прапановамі сабрацца пагуляць у настолкі ці з'ездзіць на экскурсію ў суседні горад. З часам пачаў фармавацца актыў, які, асабліва пасля пачатку вайны ва Украіне, надаў новы імпульс і разуменне гэтай супольнасці. Мы пачалі вялікую рэарганізацыю, вызначыліся з мэтамі і кірункамі дзейнасці, правялі рэбрэндынг і сталі называцца «Студэнцкай Прысутнасцю».

Самае важнае для нас – яднаць студэнтаў і моладзь Уроцлава. І робім мы гэта самымі рознымі метадамі: ладзім кінапрагляды, сустракаемся па выходным за куфалем студэнцкага піва і размовах пра жыццё, ладзім пікнік ці едзем у велавандроўкі. Вядзем свой канал у тэлеграме, дзе спрабуем прыцягваць з дапамогай забаўляльнага, адукацыйнага і інфармацыйнага кантэнта. Плануем фармаваць невялічкія суполкі беларускіх студэнтаў у розных універсітэтах, дзе будзем не толькі знаёміцца і дапамагаць адно адному, але і весці навуковую дзейнасць. У нашых планах атрымаць дзяржаўную рэгістрацыю і стаць афіцыйным аб'яднаннем, на што мы зараз прыкладаем шмат высілкаў. Адукацыйных праграм таксама можна чакаць, ды і яшчэ шмат чаго.